الطماطم تشعل الأسعار قبل رمضان والمواطنين حائرين: فين غادي يوصل الثمن؟

مغربية بريس

متابعة خاصة ……قسم الأخبار

فالأيام اللي فاتت، عرفات الطماطم واحد الارتفاع صاروخي فالثمن ديالها، بحيث كانت كتبيع بـ5 دراهم للكيلو، واليوم ولات بـ13 درهم فالأسواق. هادشي خلا المواطنين يديروا يديهم على قلوبهم خصوصا حنا على أبواب رمضان، الشهر اللي كتكثر فيه المصاريف.
واحد المواطن قال: “واش حتى الطماطم غادي تولي غير للأغنياء؟ فين غادي يوصل الثمن ديالها فرمضان؟”، وزاد مواطن آخر: “فين هو دور المسؤولين باش يحافظو على التوازن فالأثمنة؟ هاد الظروف صعيبة بزاف على المواطن البسيط”.
واحد من الباعة فالسوق قال لجريدة “مغربية بريس” بأن ثمن الصندوق وصل لـ325 درهم، واعتبر هاد الثمن قياسي وعمرها ما وصلاتو الطماطم من قبل. بينما بائع آخر قال: “الحل بيد المواطنين، إلا شافو الثمن زايد بزاف، خاصهم ما يشريوش حتى يطيح”.
ومنين كنهدرو على الطماطم، خاصنا ما نساوش الحادثة اللي وقعات فـ”حد ولاد جلول” فالغرب فواحد العام اللي فات، ملي وقع نهب فالسوق بسبب المضاربة فالطماطم، وهادشي خلا المنطقة تعاني من سمعة سيئة.
دابا ومع البرد القارس وزيادة الطلب فرمضان، كيبقى السؤال: واش الأسعار غادي تزيد؟ ولّا غادي يتدخل شي حد باش يحمي جيب المواطن؟