مغربية بريس
متابعة خاصة ……قسم الأخبار
نفايات طبية خطيرة وسط حي الرحمة بسلا تثير الرعب!
في مشهد صادم وخطير، تفاجأ سكان حي الرحمة بمدينة سلا، بوجود حقن مستعملة، قراعي ديال الجلبة، وحتى نفايات طبية خطيرة مرمية فالشارع. هاد النفايات كانت مخصصة لتلقيح داء الحصبة (بوحمرون)، ولكن لقاوها سايبة بلا حسيب ولا رقيب، الشي اللي زاد من مخاوف السكان على صحتهم وصحة وليداتهم.
هاد الواقعة طرحت بزاف ديال علامات الاستفهام على طريقة التعامل مع هاد النوع ديال النفايات، اللي خاص تكون تحت مراقبة صارمة. كيفاش نفايات طبية خطيرة بحال هادي توصل لشارع عام؟ وشكون المسؤول على هاد الإهمال اللي كيهدد صحة الناس؟
سكان الحي طلبوا تدخل عاجل من السلطات المحلية باش تحيد هاد النفايات وتنقي المكان، وكيطالبو بفتح تحقيق فهاد القضية اللي كتقدر تولي كارثة صحية إلا ما تعالجتش بسرعة.
هاد المشكل كيبين مرة أخرى الخصاص الكبير فمجال تدبير النفايات الطبية فالمدينة، وكيأكد الحاجة لإجراءات صارمة باش ما يتكررش هاد الإهمال اللي كيهدد صحة المواطنين بشكل مباشر.